Aankh Ban Jati Hai Sawan Ki Ghata Shaam Ke Baad

Aankh Ban Jati Hai Sawan Ki Ghata Shaam Ke Baad

Laut Jaata Hai Agar Koi Khafa Shaam Ke Baad

Wo Jo Tal Jati Rahi Sar Se Bala Shaam Ke Baad

Koi To Tha Ke Jo Deta Tha Dua Shaam Ke Baad

Aanhen Bharti Hai Shab-E-Hijr Yateemon Ki Tarah

Sard Ho Jaati Hai Har Roz Hawa Shaam Ke Baad

Shaam Tak Qaid Raha Karte Hain Dil Ke Andar

Dard Ho Jate Hain Saare Hi Rehaa Shaam Ke Baad

Log Thak Haar Ke So Jate Hain Lekin Janaa

Hum Ne Khush Ho Ke Tera Dard Saha Shaam Ke Baad

Chand Jab Ro Ke Sitaaron Se Galay Milta Hai

Ik Ajab Rang Ki Hoti Hai Fizaa Shaam Ke Baad

Hum Ne Tanhaai Se Pucha Ke Milo Gi Kab Tak

Us Ne Be-Chaini Se Foran Hi Kaha Shaam Ke Baad

Tum Gaye Ho To Siyah Rang Ke Kapre Pehne

Phirti Rehti Hai Mere Ghar Mai Qaza Shaam Ke Baad

Maar Deta Hai Ujarr Jaane Ka Dohra Ehsaas

Kaash Ho Koi Kisi Se Na Judaa Shaam Ke Baad

My CoNtaCt # Is 0300-7200080 Enjoy My blog.