deewaroN say mil kar rona achcha lagta hay

hum bhi pagal ho jaeen gay esa lagta hay

kitnay dino kay piyasay hoN gay yaro socho to

shabnam ka qatra bhi jin ko dariya lagta hay

aankhoN ko bhi lay Dooba ye dil ka pagal pan

aatay jatay jo milta hay tum sa lagta hay

is basti main kon humaray aansoo poonchay ga

jo milta hay us ka daman bheega lagta hay

duniya bhar ki yadain hum say milnay aati hain

sham Dhalay is soonay ghar main mela lagta hay

kis ko pathar maroon qaisar kon paraya hay

sheesh mehal main ek ek chehra apna lagta hay